අපගේ කාර්ය මණ්ඩලය

2018 අගෝස්තු මාසයේදී අධ්‍යක්ෂක මණ්ඩලයට පත්කරන ලදි
දුමිත් ප්‍රනාන්දු 2018 අගෝස්තු මාසයේ සිට යුනියන් ඇෂුවරන්ස් සමාගමේ ස්වාධීන විධායක නොවන අධ්‍යක්ෂක වරයෙකු ලෙස කටයුතු කරයි. ඒ මහතා මෙරට ප්‍රමුඛ පෙළේ ස්වාධීන ආයෝජන බැංකුවක් සහ පර්යේෂණ හා කොටස් තැරැව්කරු සමාගමක් වන Asia Securities (පුද්.) සමාගමේ සභාපති ලෙසද කටයුතු කරමින් සිටී. 2013 වසර දක්වා ඒ මහතා ඇමරිකා එක්සත් ජනපදයේ JP Morgan Chase & Co, සහ ස්විට්සර්ලන්තයේ Credit Suisse AG බැංකු වල ජාත්‍යන්තර ආයෝජන බැංකුකරණය සම්බන්ධයෙන් දශක දෙකකට අධික අත්දැකීම් සම්භාරයක් ලබා ඇත. ඇමරිකානු ඩොලර් බිලියන 2.5 කට අධික ආදායමක් සහිත, රටවල් 12 ක ව්‍යාප්ත වූ Credit Suisse සමාගමේ ආසියානු පැසිෆික් කලාපයේ කළමනාකාර අධ්‍යක්ෂ සහ සමූහ ප්‍රධාන විධායක නිලධාරී ලෙස මෙන්ම එම සමාගමේ ගෝලීය නායකත්ව කවුන්සිලයේ සාමාජිකයෙකු ලෙසද ඒ මහතා කටයුතු කර තිබේ. ප්‍රනාන්දු මහතා කොළඹ කොටස් හුවමාරුවේ සහ සිංගර් (ශ්‍රී ලංකා) සමාගමේ අධ්‍යක්ෂවරයෙකි. ආසියානු කලාපයේ ප්‍රමුඛ පෙළේ කළමනාකරණ සමාගමක් වන හොංකොං හි Tybourne Capital Management සමාගමේ ජ්‍යෙෂ්ඨ උපදේශකවරයෙකු වන ඒ මහතා ආරම්භක මට්ටමේ සමාගම් කිහිපයක විධායක නොවන අධ්‍යක්ෂවරයෙකු ලෙසද කටයුතු කරයි. ඇමරිකාවේ Middlebury College වෙතින් භෞතික විද්‍යාව සහ ආර්ථික විද්‍යාව සම්බන්ධ ගෞරව උපාධියක් හිමි ප්‍රනාන්දු මහතා Harvard Business School වෙතින් MBA සුදුසුකම් සපුරා තිබේ.

2019 වසරේ ජනවාරි මාසයේ සිට අධ්‍යක්ෂක මණ්ඩල සාමාජිකයෙකු ලෙස කටයුතු කරයි
ස්ටීවන් ඇන්තනි ඇපල්යාඩ් මහතා යුනියන් ඇෂුවරන්ස් සමාගමේ ස්වාධීන විධායක නොවන අධ්‍යක්ෂක වරයෙකු ලෙස කටයුතු කරයි. දැනට ඒ මහතා බෙදාහැරීම් ප්‍රධානී (AXA Asia Markets – Life and Non Life Insurance) ලෙසද කටයුතු කරමින් සිටී. ඇපල්යාඩ් මහතා යුරෝපය, ඇමරිකා එක්සත් ජනපදය සහ ආසියානු කලාපයේ SCB Life (තායිලන්තය), AIA (හොංකොං), Allianz (Ayudhya Allianz C.P, තායිලන්තය), American International Group (යුරෝපය, ඇමරිකා එක්සත් ජනපදය සහ ආසියාව) යන සමාගම් වල ප්‍රධාන විධායක නිලධාරී සහ කලාපීය ප්‍රධාන විධායක නිලධාරී තනතුරු වල කටයුතු කරමින් ජීවිත රක්ෂණ ක්ෂේත්‍රයේ වසර 20 කට අධික කාලයක් අත්දැකීම් ලබා තිබේ. ක්‍රමෝපාය, බෙදාහැරීම්, අලෙවිකරණය සහ මූල්‍ය හා මෙහෙයුම් පරිවර්තන යනාදී අංශ සම්බන්ධ අත්දැකීම් සම්භාරයක් ඔහු සතු ය. AXA කලාපීය කාර්යාලය (හොංකොං) සහ Direct Money (වියට්නාමය) සඳහා උපදේශකවරයෙකු ලෙසද කටයුතු කළ ඇපල්යාඩ් මහතා තවත් මූල්‍ය-තාක්ෂණ සමාගම් රැසක උපදේශකවරයෙකු ලෙස කටයුතු කර තිබේ. ෂෙෆීල්ඩ් හැලම් විශ්ව විද්‍යාලයෙන් විද්‍යාවේදී උපාධියක් ලබා ඇති ඇපල්යාඩ් මහතා මැන්චෙස්ටර් විශ්ව විද්‍යාලයෙන් ව්‍යාපාර පරිපාලනය පිළිබඳ පශ්චාත් උපාධිය (MBA) හිමිකරගෙන ඇත.

පසන් තමින්ද වනිගසේකර ආයතනික උපායමාර්ගික ක්‍රමෝපාය, M&A, උපායමාර්ගික අලෙවිකරණය හා ව්‍යාපාර සංවර්ධනය, මෙහෙයුම් ප්‍රශස්තකරණය, ඩිජිටල්කරණය, සහ නීති කටයුතු ඇතුළු පුළුල් විෂය පරාසයක් පුරා ආසියානු ශාන්තිකර කලාපය, යුරෝපය, සහ උතුරු ඇමෙරිකාව යන රටවල පුළුල් ජාත්‍යන්තර අත්දැකීම් ලබා ඇති බහුවිධ-විෂය ක්ෂේත්‍ර පිළිබඳ දැනුම සහිත ආයතනික නායකයෙකි.
වර්ෂ 2022 ජනවාරි දක්වා ශ්‍රී ලංකා ආයෝජන මණ්ඩලයේ (Invest Sri Lanka) අධ්‍යක්ෂ ජනරාල් ලෙස කටයුතු කළ ඔහු එතැන් සිට මූල්‍ය, සත්කාරක, මෝටර් වාහන, කෘෂිකර්මාන්ත, පර්යේෂණ හා සංවර්ධන, තිරසර බලශක්ති, සහ නිෂ්පාදන අංශයන්හි ක්‍රියාත්මක විවිධ මුල් පෙළේ ප්‍රකට ආයතන රැසක මාණ්ඩලික තනතුරු දරා ඇත.
සිය ආයතනික වෘත්තීය දිවියේ මුල් කාලයේදී ඔහු Moody’s Corporation හි අනුබද්ධ ආයතනයක ආසියා ශාන්තිකර ව්‍යාපාර කටයුතු සම්බන්ධ අධ්‍යක්ෂවරයකු විය. Moody’s හි සේවය කළ අවධියේ සිටම ඔහු නීතිඥවරයකු ලෙස කටයුතු කරන අතරම, Fortune 500 සමාගම් සහ ආසියාවේ PE Funds ගණනාවක ආයෝජන විශ්ලේෂණය, M&A” සහ මෙහෙයුම් ප්‍රශස්තකරණය පිළිබඳ උපදේශකවරයකු ලෙසද කටයුතු කළේය.
මොරටුව විශ්වවිද්‍යාලයෙන් සිය ඉංජිනේරු උපාධිය සඳහා අධ්‍යයන කටයුතු සපිරූ ඔහු සුදුසුකම් ලත් නීති වෘත්තිකයකු මෙන්ම, වරලත් මූල්‍ය ගණකාධිකාරීවරයකු සහ වරලත් අලෙවිකරුවකුද වෙයි.

2025 අප්‍රේල් සිට අධ්‍යක්ෂ මණ්ඩල සාමාජික
ශ්‍රී ලංකාවේ සහ කැනඩාවේ ප්‍රාග්ධන වෙළෙඳපොළ සම්බන්ධයෙන් වසර 25කට අධික පළපුරුද්ද ක්‍රිස්ටීන් ඩයස් බණ්ඩාරනායක සතුව ඇත. Jafferjee Brothers සමූහයේ අභිමතානුසාරී වත්කම් කළමනාකරණ අංශය 2011 වසරේදී පිහිටුවන ලද ඇය මේ වනවිට JB Financial (Pvt) Ltd හි ප්‍රධාන විධායක නිලධාරිනිය සහ ආයෝජන කළඹ කළමනාකාරිනිය ලෙස සේවය කරයි.
ටොරොන්ටෝ නුවර TD Bank Financial Group හි අන්‍යෝන්‍ය අරමුදල් සහ පෞද්ගලික ධන කළමනාකරණ කටයුතු සමඟ සිය වෘත්තිය ඇරැඹූ ඇය පසුව කොළඹ Citi National Investment Bank හා සම්බන්ධ වූවාය. වරලත් මූල්‍ය විශ්ලේෂිකාවක (CFA) වන ඇය බටහිර ඔන්ටාරියෝ විශ්වවිද්‍යාලයෙන් කලා ශාස්ත්‍රවේදී (ගෞරව) උපාධියක් මෙන්ම ටොරොන්ටෝ විශ්වවිද්‍යාලයෙන් ආර්ථිකවිද්‍යාව පිළිබඳ ශාස්ත්‍රපති උපාධියක් ද හිමිකරගෙන ඇත.
දැනට Unit Trust Association of Sri Lanka හි සභාපතිනිය ලෙස කටයුතු කරන ඇය CFA Society Sri Lanka හි හිටපු උප සභාපතිනියක සහ අධ්‍යක්ෂවරියක ද වෙයි.

2020 ජූනි මස සිට අධ්‍යක්ෂ මණ්ඩලය සාමාජිකයෙකි
දමින්ද ගම්ලත් මහතා 2020 ජූනි 10 වන දින යුනියන් ඇෂුවරන්ස් සමාගමේ විධායක නොවන අධ්‍යක්ෂවරයෙකු ලෙස පත්වීම් ලැබී ය. මොරටුව විශ්ව විද්‍යාලයෙන් විද්‍යාවේදී ප්‍රථම උපාධිය (B.Sc.) ලබා ඇති ඒ මහතා කොළඹ විශ්ව විද්‍යාලයෙන් ව්‍යාපාර පරිපාලනය පිළිබඳ පශ්චාත් උපාධිය (MBA) ලබා තිබේ. මූල්‍ය ගිණුම්කරණය, කළමනාකරණ ගිණුම්කරණය, ව්‍යාපාර විශ්ලේෂණය, විකුණුම්, අලෙවිකරණය සහ පොදු කළමනාකරණය වැනි අංශ සම්බන්ධ විශේෂඥ දැනුමක් ඒ මහතා සතු ය. CIMA UK සුදුසුකම් සපුරා ඇති ඒ මහතා දැනට ජෝන් කීල්ස් සමූහ ව්‍යාපාරයේ ආහාරපාන සම්බන්ධ සමූහයේ (Consumer Foods Industry Group) සභාපති ලෙස කටයුතු කරන අතර Ceylon Cold Stores PLC සහ Keells Food Products PLC යන සමාගම් වල අධ්‍යක්ෂවරයෙකු ලෙස සේවය කරයි. තවද ඒ මහතා John Keells Computer Services (පුද්.) සමාගම සහ ජෝන් කීල්ස් සමූහයේ තොරතුරු තාක්ෂණය අංශය (IT Industry Group) සමගද සම්බන්ධ වී සිටී. ජෝන් කීල්ස් සමූහ ව්‍යාපාරය සමග එක්වීමට පෙර ඒ මහතා Hayleys Electrocis සමාගම සහ Hayleys Indstrial Solutions (පුද්.) සමාගම යන සමාගම් වල සේවය කළේ ය.

විධායක අධ්‍යක්ෂ සහ යූනියන් ඇෂුවරන්ස් පී.එල්.සී. හි ප්‍රධාන විධායක නිලධාරී සෙනත් ජයතිලක 2019 වසරේ මෙම සමාගමට සම්බන්ධ වූයේ ජෝන් කීල්ස් සමූහය ද ඇතුළුව ආයතනික ක්ෂේත්‍රයේ වසර 16කට අධික කාලයක පළපුරුද්ද සහිතවය. ප්‍රධාන විධායක නිලධාරී ලෙස සේවා කටයුතු ඇරැඹීමට පෙර, ඔහු මෙම සමාගමෙහි ප්‍රධාන බෙදාහැරීම් නිලධාරී සහ නියෝජ්‍ය ප්‍රධාන විධායක නිලධාරී ලෙසද කටයුතු කළේය. යූනියන් ඇෂුවරන්ස් පී.එල්.සී. ආයතනයට පත්වීම ලැබීමට පෙර, ඔහු ජෝන් කීල්ස් ලොජිස්ටික්ස් (ප්‍රයිවට්) ලිමිටඩ් හි ප්‍රධාන විධායක නිලධාරී තනතුර දැරීය. ඔහුගේ විශේෂඥතාව ව්‍යාපාර සංවර්ධනය, මෙහෙයුම් කළමනාකරණය, විකිණුම් සහ අලෙවි, ආයතනික මූල්‍ය කටයුතු, සහ ව්‍යාපාර උපායමාර්ග ඇතුළු විෂය පරාසයන් පුරා විහිද යයි. නොටින්හැම් විශ්වවිද්‍යාලයෙන් (එක්සත් රාජධානිය) මූල්‍ය, ගිණුම්කරණය, හා කළමනාකරණය පිළිබඳ සාමාන්‍යවේදී (ගගෟරව) උපාධියක් සහ ශ්‍රී ජයවර්ධනපුර විහ්වවිද්‍යාලයේ (ශ්‍රී ලංකාව) කළමනාකරණය පිළිබඳ පශ්චාත් උපාධි ආයතනයෙන් ව්‍යාපාර පරිපාලන ශාස්ත්‍රපති උපාධියක් ද හිමිකරගෙන ඇති සෙනත් වරලත් කළමනාකරණ ගණකාධිකාරි ආයතනයේ (එක්සත් රාජධානිය) සහකාර වරලත් කළමනාකරණ ගණකාධිකාරීවරයකු සහ වරලත් ජාත්‍යන්තර කළමනාකරණ ගණකාධිකාරීවරයකු ද වෙයි.